الفصل الأول عشق الكنان الجزء الثاني

 كامل الأوصاف

 عشق وكنان 

الفصل ٢١

سألها كنان وهو مستغرب خوفها: 

هو إنتي ليه خايفة مني أنا بحبك يا عشق وعايزك تحسي معايا بالأمان والطمأنينة أوعي فى يوم تحسي بخوف واللي جواك قوليه. 

تنهدت عشق 

أنا مصدومة ومتلخبطه بين شخصيتك اللي كنت أعرفها وبين دلوقتي اعذرني يعني أنا واخدة على أيمن كنت بقوله يابني وياعم ومصطلحات كتير كان يضحك عليها ويتكلم معايا بنفس أسلوبي 

أيمن هو اللي كان معايا وقت تعب بابا وشاف حزني وكان بيحاول يخفف عني بكلمة أو ضحكة 

اما مستر كنان تعاملي معاه كان من خلال الورق 

‏وكلها كانت تعليمات دكتور ليه شأنه ومكانته في الجامعة وفى الشركة منكرش إنك وقت ما كنت بتشرحلي قبل الإمتحانات إني حسيت إن دا إستحالة يكون عامل بسيط أو حتى طالب لسه متخرج من الجامعه علشان شرحك كان فعلاً زي الدكتور لكن وقتها مكنتش مركزة

 إنت إزاي عرفت تفصل مابين كنان وأيمن ما بين الدكتور كنان رفيع وبين أيمن السواق أنا مش عارفه بجد ..

إبتسم كنان وسألها :

أكيد كان صعب ومش هكذب عليكي أنا اكتشفت نفسي معاكي من خلال أيمن اه كان صعب عليا أوي لكن إنتي اللي علمتيني

 أول مره ركبت فيها أتوبيس كان معاكي وقتها مكنش معايا حرفيا فلوس فكة أو أي فلوس كان كله كريدت كارت وقتها عيشت حياة الناس البسيطة

وفاكر أول مره أكلت سندوتش فول على العربية إنتي بردوا اللي علمتني لما كنتي تعبانة وخرجتي من الجامعة وقولتي إنك جعانة ولما سألتك تحبي تاكلي إيه ..

ضحكت عشق 

اه والله وقتها كنت هموت من الجوع ومكنش معايا فلوس نجيب أكل من الجامعة وإنت بتقولي أشتري اكل من المطاعم وقتها ضحكت عليك وقولتلك 

أكل من مطعم إيه يا أيمن ما تقولي يايسطا إنت ليه عايز تصرف أول مرتب ليك على أكلة تعالى معايا بس هناكل أكلة هنعقد طول اليوم عليها ..

إبتسم كنان 

أنا وقتها إستغربت أكلة إيه اللي تفضل قاعد طول اليوم عليها من غير مانجوع ولما إنتي وقفتيني بعيد بالعربية وقولتي 

نزلنا هنا واقفل العربية كويس وتعالى هكلك طبق فول من اللي قلبك يحبه أنا كنت زي المسحور فعلاً مشيت وراك وأنا بحاول أكون العامل البسيط وعند عربية فول وطعمية كنت مصدوم لكن بقيت

أحاول اقلد الناس اللي واقفة 

عشق هزت راسها 

والله العظيم مش عارفه أقولك إيه أنا آسفة إني عيشتك في مستوى العالم بتاعي أنا مبسوطه إنك بتقول إنك اتغيرت علشاني ..

كنان هز رأسه 

‏طيب بمناسبة الأكل أنا  جعان وإنتي إتأخرتي عليا وأنا لما بكون جعان عقلي بيكون واقف فهمتي بقى ليه دخلتك هنا لكن إنتي مصممة تفضلي واقفة على الباب 

عشق ببتسامة 

حاضر بس إنت اتعامل معايا دلوقتي على إنك كنان بيه وروح شوف شغلك ..

ضحك كنان وسألها 

طيب لما كنتي في حضني من شوية حسيتي بمين هو اللي معاكي ولما شفايفي لمست شفايفك حسيتي بمين عايز أفهم إحساسك ومشاعرك كلها 

عشق اتكسفت من سؤاله 

إنت ضحكت عليا على فكرة وخطفتني من قدام الشركة ودلوقتي بتخطفني تاني وبتدخلني البيت بالعافيه وبعد كدة تقولي جعان 

إنت مصمم تخليني أحس إنك شخصيتين فالافضل إننا نتعرف على بعض من الأول علشان في لحظة بحس معاك فيها بالأمان  وبلحظة بالخوف ..

إبتسم كنان:

طيب أنا فهمت دلوقتي إنتي عايزه تتعرفي على كنان رفيع صح ..

عشق هزت راسها بتأكيد

طبعاً بس قبل ما أعرفه أنا لازم كل اللي في الشركة يعرفه الأول 

إنت خلاص عرفت مين عدوك وكمان قدرت تخرج من العزلة اللي كنت عايش فيها غصب عنك يبقي لازم تكون مدير بجد تعرف كل حاجه عن كل موظف عندك ..

كنان ببتسامة 

ما أنا عارف عنهم كل تفصيلة كبيره أو صغيرة ..

عشق هزت راسها بالنفي:

لا طبعاً إنت تعرف أسماء بتتسجل ببصمة على الكومبيوتر أنا بتكلم عن بشر إحساس مشاعر فاهمني

كنان

حاضر ياستي هروح أعمل إجتماع دلوقتي وإنتي حضري الأكل وبعد كدا لما نرجع هبقى أعرف الكل اوك 

ابتسمت عشق 

حاضر يا مستر كنان

شهق كنان 

مستر كنان ماشي ياعشق لما نشوف آخرتها إيه معاكي ..

خرج كنان للبلكونه وقعد على كنبة كبيرة بيبص على الحديقة وساب عشق تعمل الأكل لأنه بقى مدمن الأكل اللي بتعمله بإيديها أول مرة ياكل أكل بيتي وصحي من ايديها 

رجع راس لورا وهو مبسوط مكنش متصور إنه فى يوم يحس بالسعادة دي كلها

قطع شروده عامل فى المزرعة  

مساء الخير يا كنان بيه الحمد لله على السلامه ليك وحشه

إبتسم كنان ورد عليه

إزيك يا عم سلطان أخبارك إيه ..

 

سلطان 

الحمدلله يابني نشكر ربنا كله من خيرك إنت والباشا رفيع ..

 

إبتسم كنان 

متقولش كدا ياراجل ياطيب إنت الخير والبركة أؤمرنى ..

إبتسم سلطان 

والله محرج منك يا كنان بيه لكن يكون لي الشرف إنك تحضر فرح بنتي الوحيدة النهاردة الحنه وبكرة كتب الكتاب وكمان جيب السنيورة معاك ياه متعرفش هنفرح إزاي بمجيتك عندنا ..

 

إبتسم كنان 

أكيد طبعاً هاجي هيكون الساعه كام ..

إبتسم سلطان بفرحة  

الساعة 8 يابيه والله ما عارف أشكرك إزاي هو هيتعمل هنا في المزرعة مع الفلاحين هتنبسط أوي هيكون بين الغيطان وهنولع كهربا ونحط زينة ..

سألها كنان 

معنى كدا إنك هتحتاج مساعدة هتغدى وهاجي أنا وعشق ونساعدكم تمام ..

سلطان بفرحة 

والله ما عارف أقولك إيه أكيد طبعاً تنورنا مستنينك ..

سلطان مشي وكنان دخل وراح  يراقب عشق من بعيد 

عشق بدأت تجهز الأكل وتظبط الدنيا عملت نفس اللي كانت بتعمل معاه حطتهم جوا صينية 

كنان برفض

لا المرة دي هناكل مع بعض مفيش مدير يعني حط الأكل على تربيزية المطبخ إتفقنا ..

 

عشق هزت راسها

تمام هروح أغير هدومي أخ نسيت انا معنديش هدوم ..

كنان بصدمه

إنتي لسه مصممة إنك متلبسيش من الفساتين والله لو ملبستيش مش هاكل ..

عشق كانت محتارة

حاضر متزعلش نفسك بس بشرط هحاسبك على تمن الفساتين اللي هلبسها إنت عارف طبعي مش جديد عليك ..

ضحك كنان 

هتقوليلي إعملي اللي يعجبك يامجنيناني لحد ما توافقي عليا 

اه نسيت أقولك إحنا معزومين على فرح بنت مستأجر المزرعه فاختاري فستان حلو ..

 

عشق بفرحة

بجد فرح في الريف كان نفسي أحضر فرح معاك طبعاً..

طلعت عشق تجري بطفولة غيرت هدومها ولبست فستان لونه سماوي من لون السماء والبحر سادة لفت شعرها كحك ونزلت كانت أميرة 

كنان انبهر بيها مكنش قادر يسيطر على مشاعره لكن لازم تكون متقبلاه الأول 

كنان صفر تصفير بإعجاب 

إيه الحلاوة دي أنا مش قدك 

عشق اتكسفت قعدت وبدؤا ياكلوا

ولما خلصوا شالت الأطباق وكانت لسه هتغسلهم كنان برفض

لا بقى الفستان دا ماينفعش لده أنا عندي هنا غسالة أطباق وفتح الغسالة وحط كل الصواني والأطباق جواها وحدده على وقت 

وسحبها من إيدها وقال 

يلا بينا وانجشها من ذراعها مشيت جنبه وهي فعلاً أميرة 

مشيوا ناحية الأرض والزرع وكانت فرحانة أوي كل اللي فى المزرعة رحبوا بيها عرفهم كنان 

كنان

خطيبتي عشق حسين مكتوب كتابنا وإن شاءالله قريب جداً هنتجوز 

عشق اتحرجت وحست إنه بيحطها قدام الأمر الواقع لكن بردوا هي بنت وسمعتها ووجودها هنا مكنش ينفع من غير ماتعرف الناس بكتب الكتاب حتى قربه منها دا علشان هي حلاله ملهاش دعوة إن كان توكيل المهم إنهم وقت ماوكلوا أهلهم كانوا موافقين على أي قرار 

سلطان لما عرف فرح أوي وخطط مع أهل المزرعه على خطة وبعد ما قاموا بتزين المكان كانت عشق بتساعدهم وهي مبسوطه أوي كنان كان بيتابعها من بعيد وهي وسط الزينة والأرض الزراعية حوريه من الجنه 

قرب المغرب والكل صلى الستات في دار كبيرة والرجالة في الساحة وبعد كدا بدأت حفلة الحنة

والرقص والغنى وبدأت البنات تحط حنة لبعض وطلبوا عشق تشاركهم وفعلا حطت حنة معاهم على ايديها ورسمت بتاعت الحنة قلب على رقبتها وفرع زهرة على كتفها وفتحت الفستان ورسمت على ظهرها 

كانت عشق فرحانة أوي بالجو ده والاحتفال خرجها من حزنها والمها على فراق أبوها 

عند الرجال الضحك والأغاني الشعبية والرقص بالخشب وبعد كدا بدأ العشاء ينزل هنا وهنا 

مر الوقت عليهم  خرجت عشق برا تدور على كنان كانت بتلف يمين وشمال 

جه كنان من وراها بتدوري على مين 

عشق انتفضت واترمت في حضنه من الخوف 

ضمها كنان لحضنه وطمنها

 طول ماإنتي معايا مفهوم متخافيش تعالي معايا 

قعدت جنبه على حصيرة كانت مفروشه على الأرض ومع الهواء بدأ النوم يداعب عينيها ومالت على كتفه من التعب 

كنان سابها تنام وفض باصصلها بحب وفضل صاحي علشان يكون مطمن عليها 

سلطان قرب منه 

إنت بتحبها جوي ياكنان بيه

إبتسم كنان 

حبى ليها مش عارف اوصفه والله يا عم سلطان حاجة كدا اخترقت كل كياني زي الرصاص اللي بيخترق القلب مباشرة" 

إبتسم سلطان 

رأيك إيه إن دخلتكم تكون بكرة مع بنتي وأني جهزت فستان فرح ليها وبدلة  ليك إيه رأيك..

يتبع ..............